नैसर्गिक पद्धतींचा वापर करून गर्भधारणा कशी टाळावी?

साधारणपणे स्त्रीचे मासिक पाळी चक्र २८ दिवसांचे असते. हा कालावधी कधीकधी एक-दोन दिवसांच्या अंतराने कमी जास्त होऊ शकतो. मासिक पाळी चक्र तीन टप्प्यांमध्ये विभागलेले असते.

जेव्हा पुरुषाचे शुक्राणू आणि स्त्रीच्या बीजाचे मिलन होते तेव्हा गर्भधारणा होत असते. जेव्हा एखाद्या स्त्रीचे अंडाशय बीज सोडते तेव्हा ते केवळ १२ ते १४ तास जगते. तर पुरुषाचे शुक्राणू सुमारे तीन दिवस जगतात. २८ दिवसांच्या सामान्य मासिक पाळी चक्राचा विचार करता एक स्त्री सामान्यतः १४ व्या दिवसाच्या आसपास प्रजननक्षम होते. जर एखाद्या पुरुषाचे शुक्राणू गर्भाशयात उपलब्ध असतील तर गर्भधारणा होऊ शकते. काही प्रकरणांमध्ये ओव्हुलेशन १२, १३ किंवा १४ दिवसांच्या आसपास होऊ शकते. ओव्हुलेशन म्हणजे जेव्हा एखादी स्री प्रजननसाठी बीज बाहेर सोडते. ओव्हुलेशन हे महिलेच्या मासिक पाळीवर अवलंबून असते. काही स्रियांचे मासिक पाळी चक्र हे जास्त दिवसांचे असते तर काही स्रियांचे मासिक पाळी चक्र हे २८ दिवसांपेक्षा कमी असते. त्यामुळेच मासिक पाळी चक्र म्हणजे काय? आणि ओव्हुलेशन कधी होते? हे जाणून घेणे अधिक महत्त्वाचे आहे. नैसर्गिकरित्या गर्भधारणा टाळणे हे आपण आपल्या ओव्हुलेशन दिवसाचा अचूक अंदाज किती अचूकपणे लावू शकतो यावर अवलंबून आहे.

आतापर्यंत आपण मासिक पाळी चक्र म्हणजे काय? आणि गर्भधारणा कशी होते? याविषयी माहिती घेतली. आता वेगवेगळ्या नैसर्गिक गर्भनिरोधक पद्धती आणि या पद्धतींचा वापर करून गर्भधारणा कशी टाळता येईल हे पाहुयात.

नैसर्गिकरित्या गर्भधारणा टाळण्याची ही अजून एक पद्धत आहे. या पद्धतीमध्ये वीर्य किंवा शुक्राणूंना योनीपासून दूर ठेवले जाते. या पद्धतीत पुरुष जोडीदार शुक्राणूंना योनीमध्ये जाण्यापासून रोखण्यासाठी स्खलन होण्याआधीच स्वतःला मागे घेतो. योनीपासून दूर स्खलन केल्याने वीर्य योनीमध्ये प्रवेश करत नाही व गर्भधारणा टाळली जाते. वीर्याच्या फक्त एका थेंबामुळेदेखील गर्भधारणा होऊ शकते, म्हणून कोणतेही वीर्य बाहेर येण्यापूर्वी स्वतःला मागे घेणे हे खूप आवश्यक असते.

अवरुद्ध पद्धतीचे कार्य उत्तम होण्यासाठी गर्भनिरोधक गोळ्या किंवा कंडोमसारख्या इतर गर्भनिरोधक पद्धतींचा वापर करणे आवश्यक आहे. इतर गर्भनिरोधक पद्धती वापरल्यामुळे, वीर्याचा थेंब बाहेर पडले तरीही गर्भधारणेपासून सुरक्षा मिळते. अवरुद्ध पद्धतीबरोबर कंडोमचा वापर हा खूप प्रभावी ठरतो. कंडोम हे वीर्याचा थेंब बाहेर पडले तर गर्भधारणेपासून सुरक्षा देतो आणि लैंगिक आजारांपासूनही सुरक्षा देतो. तसेच अवरुद्ध पद्धतीचा सराव करण्यासाठी कंडोम या गर्भनिरोधक पद्धतीचा वापरदेखील फायदेशीर ठरतो. अवरुद्ध गर्भनिरोधक पद्धतीचा प्रभावीपणे वापर करून गर्भधारणा कशी टाळायची हे आपण वेळेचे गणित किती अचूकपणे करतो यावर अवलंबून असते. यासाठी तुमचा सराव असणे आणि स्वतःवर नियंत्रण असणे आवश्यक आहे. आपण गर्भधारणा टाळण्यासाठी किंवा कुटुंब नियोजनासाठी केवळ नैसर्गिक पद्धतीवर अवलंबून असल्यास ऐनवेळी वापरता येईल अशा पद्धतींपैकी एखाद्या पद्धतीचा पर्याय हाताशी ठेवणे कधीही योग्य ठरते.

या नैसर्गिक गर्भनिरोधक पद्धतीत आरोग्याला कोणताही धोका नसतो. तसेच कोणतेही संप्रेरक किंवा रसायने शरीरात प्रवेश करत नाहीत. संभोगाच्या आधी किंवा नंतर कोणतीही तयारी करावी लागत नाही. जर तुमचे स्वतःवर चांगले नियंत्रण असेल तर तुम्ही गर्भधारणा टाळण्यासाठी या पद्धतीचा प्रभावीपणे वापर करू शकता.

ही गर्भनिरोधक पद्धत गर्भधारणा टाळण्यासाठी सर्वात अविश्वसनीय पद्धतींपैकी एक मानली जाते. यामध्ये अयशस्वी होण्याचे प्रमाण सर्वाधिक असते. यासाठी बऱ्याच गोष्टींवर नियंत्रण ठेवावे लागते. तसेच याचा लैंगिक समाधान मिळण्यावरही परिणाम होतो. अवरुद्ध पद्धतीचा वापर करून नैसर्गिकरित्या गर्भधारणा टाळणे हे थेट तुमच्या भावनिक आणि शारीरिक नियंत्रणावर अवलंबून असते. लैंगिक संबंध ही अतिशय सक्रिय प्रक्रिया आहे आणि त्यात ही पद्धत अयशस्वी होण्याची शक्यता खूप जास्त असते. म्हणून गर्भधारणा टाळण्यासाठी आणि उत्तम कुटुंब नियोजनासाठी अवरुद्ध पद्धतीसह इतर काही गर्भनिरोधक पद्धतींचा वापर करणे अत्यंत गरजेचे आणि योग्य ठरते. तसेच हे लक्षात घ्या की, ही गर्भनिरोधक पद्धत लैंगिक आजारांपासूदेखील संरक्षण करत नाही. त्यामुळे अवरुद्ध पद्धतीत कंडोमचा वापर करणे योग्य पर्याय ठरतो. कंडोम वापरल्याने लैंगिक आजारांपासूनदेखील संरक्षण मिळते आणि गर्भधारणा टाळण्यासाठी अतिरिक्त कवच म्हणूनदेखील काम करतो.

ब्रह्मचर्य म्हणजे लैंगिक संबंध पूर्णपणे टाळणे होय. ब्रह्मचर्य ही सर्वात प्रभावी गर्भनिरोधक पद्धतींपैकी एक पद्धत आहे. यामध्ये तुम्हाला स्वतःवर संयम ठेवणे गरजेचे असते. ही नैसर्गिक गर्भनिरोधक पद्धती १०० टक्के प्रभावी ठरणारी आहे. संयमाचा अर्थ व्यक्तीपरत्वे वेगळा असू शकतो. काही लोकांसाठी संयम म्हणजे कोणत्याही प्रकारचे लैंगिक संबंध न ठेवणे असा होतो. तर काही लोकांसाठी संयम म्हणजे केवळ योनीतून लैंगिक संबंध न ठेवता इतर लैंगिक क्रियांनी संबंध ठेवणे असा आहे. जेव्हा संयमाने गर्भधारणा रोखण्याची वेळ येते, तेव्हा केवळ योनीमार्गातील लैंगिक संबंध टाळणे आवश्यक असते.

ह्या नैसर्गिकरित्या गर्भनिरोधक पद्धतीमध्ये वीर्य यौनीपासून दूर ठेवणे खूप आवश्यक असते. वीर्यातील शुक्राणूंच्या पेशी स्त्रीच्या अंड्यांपासून दूर ठेवल्यास, गर्भधारण होत नाही. जर तुम्ही प्रत्येकवेळी संयमीपणे वागलात आणि योनीतून लैंगिक संबंध टाळलात, तर गर्भधारणा होत नाही. ज्या दिवशी प्रजननक्षम किंवा गर्भवती होण्याची शक्यता अधिक असते अशावेळी लोक गर्भधारणेपासून बचाव करण्यासाठी ह्या पद्धतीचा वापर करतात. जर तुम्ही गर्भधारणा टाळण्यासाठी लैंगिक संबंध टाळत असाल तर कधीकधी तुमच्या जोडीदाराचा गैरसमज होऊ शकतो. त्यामुळे बरेचदा तुम्हाला लैंगिक संबंध ठेवण्याची इच्छा का नाहीये याबद्दल जोडीदाराशी बोलणे ही नेहमी उत्तम गोष्ट ठरते. लक्षात ठेवा की, तुम्ही अनेक प्रकारच्या गर्भनिरोधक पद्धती वापरू शकता. म्हणून, जर तुमचा जोडीदार या पद्धतीने गर्भधारणा टाळण्यास तयार नसेल तर तुम्ही किंवा तुमचा जोडीदार इतर प्रभावी गर्भनिरोधक पद्धतीचा वापर करून गर्भधारणा टाळू शकता. दीर्घकाळात, ही एक चांगली कुटुंब नियोजन पद्धत नाही. तुमच्या जोडीदारासोबत लैंगिक संबंध हा चांगल्या नात्याचा एक महत्त्वाचा पैलू आहे. कौटुंबिक नियोजन आणि गर्भधारणा टाळण्यासाठी लैंगिक संबंध टाळण्यावर अवलंबून राहणे ही तशी चांगली कल्पना नाही. तर याचा सारासार विचार करून व आपल्या जोडीदाराची संमती घेऊनच, या गर्भनिरोधक पद्धतीचा वापर करावा.

नैसर्गिकरित्या गर्भधारणा टाळण्यासाठी ही १०० टक्के प्रभावी पद्धत आहे. या पद्धतीत कोणताही खर्च नसतो आणि आरोग्यावरदेखील कोणताच परिणाम होत नाही. यासाठी ना डॉक्टरांच्या सल्ल्याची गरज भासते ना कोणत्याही वैद्यकीय प्रक्रियेची.

ब्रह्मचर्य म्हणजेच संयमाने नैसर्गिकरित्या गर्भधारणा कशी टाळायची हे आपल्या स्व-नियंत्रणावर अवलंबून असते. लैंगिक संबंधांबाबत आपण स्वतःवर नियंत्रण ठेवू शकत नाही याची खात्री असल्यास, इतर गर्भनिरोधक पद्धतींचा वापर करा. कारण, लैंगिक संबंधांबाबत तुमचे स्व-नियंत्रण राहिले नाही तर अशावेळी तुम्हाला गर्भधारणा टाळणारे कोणतेच संरक्षण मिळत नाही. त्यामुळे अशावेळी इतर गर्भनिरोधक पद्धतींचा वापर करणे आवश्यक ठरते. याचबरोबर फक्त योनीमार्गाने ठेवलेल्या लैंगिक संबंधांमध्ये लैंगिक आजारांचा धोका असतो असे नाही. तोंडावाटे लैंगिक संबंध ठेवल्यास किंवा त्वचेच्या संपर्कात आल्यासही लैंगिक आजारांचे शरीरात संक्रमण होऊ शकते. त्यामुळे लैंगिक आजारांपासून ही पद्धत संरक्षण देत नाही.