प्रसूती आणि स्त्रीरोग तज्ञ डॉक्टर

गर्भधारणेमुळे स्त्रियांच्या शरीरात आणि प्रतिकारशक्तीत अनेक बदल होत असतात. शरीरात होणाऱ्या या बदलांमुळे बऱ्याचदा आई आणि शिशू या दोघांनाही संसर्गजन्य आजार होण्याची भिती असते. हे बदल गर्भ, गर्भाशय आणि नवजात शिशूवर विपरित परिणाम करणारे ठरतात. त्यामुळेच या आजारांपासून संरक्षण मिळविण्यासाठी गर्भवती महिलांचे लसीकरण महत्त्वाचे आहे. या लशी शरीरात रोगप्रतिकारक शक्ती निर्माण करून गर्भवती महिला आणि गर्भात वाढणारे शिशू या दोघांचाही संसर्गजन्य आजारांपासून बचाव करण्यात मदत करतात. गरोदरपणातील हे लसीकरण आईची रोगप्रतिकारशक्ती वाढविण्याबरोबरच शिशूच्या शरीरात प्रतिपिंडे (अँटिबॉडीज) निर्माण करून शिशूचे संरक्षण करते. या लेखात आपण टीडॅप (टिटॅनस, डिप्थेरिया अँड पर्टुसिस) लस, टीटी (धनुर्वात) इंजेक्शन, टिटॅनस टॉक्झॉइड लस आणि इन्फ्लुएंझा लस यांचे फायदे, गरज आणि त्या घेण्याचा योग्य काळ याविषयी माहिती घेणार आहोत.