हार्मोनल किंवा संप्रेरक गर्भनिरोधक पद्धती वापरून गर्भधारणा कशी टाळावी

प्रोजेस्टोजेन गोळ्या किंवा प्रोजेस्टिन गोळ्या ह्या गर्भनिरोधक गोळ्या असून त्यात प्रोजेस्टोजेन संप्रेरक असतात. एकत्रित गर्भनिरोधक गोळ्या सारखे यात एस्ट्रोजेन संप्रेरक नसते. प्रोजेस्टोजेन गोळी ही दररोज घ्यावी लागते. यामध्ये एका पाकिटात २८ गोळ्या असतात. यामध्ये संप्रेरक नसलेल्या किंवा स्मरणिका गोळ्या नसतात. गर्भधारणा टाळण्यासाठी तुम्हाला दररोज एक गोळी ठरलेल्या तीन तासांच्या आत घेणे आवश्यक असते. उदाहरणार्थ, जर तुम्ही सकाळी आठ वाजता प्रोजेस्टोजेन गोळी घेतली असेल तर गर्भधारणेपासून संरक्षण मिळवण्यासाठी पुढील दिवसांच्या गोळ्यादेखील सकाळी आठ ते अकरा या वेळेतच घेणे आवश्यक आहे. सकाळी अकरा वाजेनंतर गोळी घेतल्यास गर्भवती होण्याची शक्यता वाढू शकते. ही गर्भनिरोधक पद्धत काटेकोरपणे पाळणे आवश्यक असून त्याकडे दुर्लक्ष झाल्यास गर्भधारणा टाळण्यात ती प्रभावी ठरू शकत नाही. अलार्म किंवा स्मरणपत्र हे गोळी घेण्यासाठी मदत करू शकतात. त्यामुळे गोळी घेण्यासाठी सोयीस्कर वेळ निवडा आणि त्यानुसार अलार्म सुरू करा. तसेच आपल्या दैनंदिन वापरातील गरजेच्या वस्तू म्हणजे मोबाइल चार्जर, पाकीट, पर्स इत्यादी साहित्यासोबत ही गोळी बाळगल्यास गोळी घेण्याविषयी लक्षात राहील व तिचे वेळापत्रक पाळले जाईल.

प्रोजेस्टोजेन गर्भनिरोधक गोळीचा पूर्णपणे प्रभाव होण्यासाठी ठरलेल्या वेळेत किंवा पुढील तीन तासांच्या टप्प्यात ही गोळी घेणे महत्त्वाचे आहे. जर तुम्ही गोळी घेण्याचे विसरलात किंवा गोळी घेण्यास उशीर केलात तर त्याचा परिणाम थेट गर्भधारणा टाळण्याच्या शक्यतेवर होतो. तुम्ही नियमित वेळेत गोळी घ्यायला विसरलात तरीही तुमच्या हातात पुढील तीन तासांचा वेळ असतो. त्यामुळे या पुढील तीन तासांत गोळी घेण्याचा प्रयत्न करा. यामुळे गर्भधारणेपासून तुम्ही सुरक्षित राहतात. उदाहरणार्थ, जर तुम्ही काल सकाळी आठ वाजता गोळी घेतली असेल आणि आज सकाळी आठ वाजता गोळी घ्यायला विसरला असणार तर हरकत नाही. पुढील तीन तासांच्या आत म्हणजे सकाळी ११ वाजेपर्यंत गोळी घ्यायला हवी कारण या कालावधीपर्यंत तुम्ही गर्भधारणा होण्यापासून सुरक्षित असतात. परंतु, जर तुम्ही पुढील तीन तासांत गोळी घेतली नाही तर तुम्हाला गर्भधारणेपासून संरक्षण मिळत नाही तरीदेखी तुमच्या जेंव्हा लक्षात येईल तेंव्हा लागच गोळी घ्या. गोळी घेणे बंद करू नका. पुढील गोळी तुमच्या नियमित वेळेतप्रमाणे घ्या (वरील दिलेल्या उदाहरणामध्ये सकाळी ८:३० वाजता) व ते वेळापत्रक पाळा. लक्ष्यात ठेवा कि जर तुमचा ३ तासांचा ठरलेला कालावधी चुकला तर तुम्ह पुढच्या दोन दिवसांसाठी (४८ तासांसाठी) गर्भधारणा होण्यापासून सुरक्षित नाही आहात. त्यामुळे, गर्भधारणा टाळण्यासाठी या काळात इतर गर्भनिरोधक पद्धतींचादेखील वापर करा.

प्रोजेस्टोजेन गर्भनिरोधक गोळ्या बहुतांश महिलांसाठी सुरक्षित असतात. काही ठराविक महिलांना या गोळ्यांचे गंभीर परिणाम सहन करावे लागतात किंवा त्यांचा त्रास जाणवतो. तुम्ही गर्भवती असाल, एखाद्या व्याधीसाठी औषधोपचार घेत असाल, हृदयासंबंधी काही त्रास असेल, यकृत किंवा स्तनाचा कॅन्सर यांसारख्या आजारांचा सामना करीत असाल तर प्रोजेस्टोजेन गोळ्या तुमच्यासाठी सुरक्षित नसतात. त्यामुळे या गोळ्यांचे सेवन सुरू करण्यापूर्वी आपल्या डॉक्टरांशी चर्चा करा. तपासणी केल्यानंतर किंवा तुमचा वैद्यकीय इतिहास जाणून घेतल्यानंतर डॉक्टर तुम्हाला काही व्याधी आहे की नाही, तसेच या गोळ्या तुमच्या शरीराला सहन होतील की नाही याविषयी मार्गदर्शन करतात. जर तुम्ही तंदरुस्त असाल आणि तुम्हाला इतर कोणत्या व्याधीसाठी औषधोपचार सुरू नसेल तर गर्भधारणा टाळण्यासाठी तुम्ही या गोळ्या घेणे सुरू करू शकता. या गोळ्या साधारणपणे रजोनिवृत्ती काळापर्यंत किंवा वयाच्या ५५ व्या वर्षापर्यंत सुरू ठेवता येतात. प्रोजेस्टोजेन गोळ्यांमुळे अंडाशयावर असलेल्या द्रवाच्या गाठी विकसित होऊ शकतात. तसेच एकत्रित गर्भनिरोधक गोळ्यांचे जे परिणाम जाणवतात तेच परिणाम प्रोजेस्टोजेन गोळ्या घेतल्यानंतर जाणवतात. पण, हे दुष्परिणाम होण्याची शक्यता फार दुर्मिळ असते. त्यामुळे या गोळ्या सुरू करण्यापूर्वी आपल्या डॉक्टरांशी चर्चा करून त्यांच्या सल्ल्याने आपल्यासाठी कोणती गर्भनिरोधक पद्धती योग्य आहे हे ठरवावे.

प्रोजेस्टोजेन गर्भनिरोधक गोळ्या आणि एकत्रित गर्भनिरोधक गोळ्या दोन्हींचेही फायदे सारखेच आहेत. ही गोळीदेखील सोयीस्कर, सुरक्षित आणि सोपी आहे. ही अशी गर्भनिरोधक पद्धत आहे ज्यासाठी कुठलीही वैद्यकीय प्रक्रिया किंवा डॉक्टरांच्या चिठ्ठीची गरज नसते. तसेच या गोळ्या घेणे कधी सुरू करावे व कधी थांबवावे हा निर्णय पूर्णतः तुमचा असतो. स्तनपान सुरू असतानादेखील या गोळ्या घेता येऊ शकतात. काही स्रियांना अलर्जीचा त्रास असतो किंवा एस्ट्रोजेन संप्रेरकामुळे काही शारीरिक व्याधीदेखील उद्भवू शकतात. (जे एकत्रित गर्भनिरोधक गोळ्या, गर्भनिरोधक पट्टी किंवा योनीतील रिंगमध्ये असते) प्रोजेस्टोजेन गर्भनिरोधक गोळ्यांमध्ये एस्ट्रोजेन संप्रेरक नसल्याने ती गोळी अशा महिलांसाठी सुरक्षित असते. तुम्हाला धुम्रपान करण्याची सवय असेल किंवा वयाच्या कोणत्याही टप्प्यात असलात तरीही या गोळ्या तुम्ही घेऊ शकता. (परंतु, डॉक्टर धुम्रपान टाळण्याचा सल्ला देतात कारण याचा परिणाम थेट गर्भधारणेवर, प्रजनन क्षमतेवर होतो. तसेच आरोग्यविषयक गंभीर समस्यादेखील यामुळे उद्भवतात) प्रोजेस्टोजेन गोळ्यामुळे मासिक पाळीतील वेदना कमी होण्यास मदत होते. तसेच मूड स्विंग्ज आणि मासिक पाळी येण्यापूर्वी होणारा त्रासदेखील या गोळ्यांमुळे कमी होण्यास मदत होते.

प्रोजेस्टोजेन गर्भनिरोधक गोळ्या घेतल्यास मासिक पाळीचा कालावधी बदलू शकतो. काही स्त्रियांना हा बदल स्वीकारणे कठीण जाते. प्रोजेस्टोजेन गर्भनिरोधक गोळ्या घेण्याचे वेळापत्रक काटेकोरपणे पाळल्यास गर्भधारणा टाळण्याची शक्यता अधिक वाढते. त्यामुळेच तुम्ही वेळापत्रक जितके नियमित पाळणार तितकीच गर्भधारणा टाळणे प्रभावी होते. प्रोजेस्टोजेन गर्भनिरोधक गोळ्या घेतल्यास त्वचेवर डाग, स्तन कोमल होणे, डोकेदुखी होणे यांसारख्या दुष्परिणामांचा सामना करावा लागतो. गोळ्याचे दुष्परिणाम जाणवू लागल्यास आपल्या डॉक्टरांशी संपर्क साधा. तसेच आपल्यासाठी कोणती गर्भनिरोधक पद्धत योग्य आहे, गर्भधारणा टाळण्यासाठी कोणत्या पद्धतीचा वापर करावा, कुटुंब नियोजन कसे करावे याविषयी आपल्या डॉक्टरांशी चर्चा करून त्यांचे मार्गदर्शन घ्या.

गर्भनिरोधक रिंगला योनिमार्गातील अंगठीसदृश्य पदार्थ म्हणूनदेखील संबोधले जाते. ही एक प्लास्टिकची लहान रिंग असते जी गर्भधारणा रोखण्यासाठी आपल्या योनीमध्ये ठेवली जाते. हे पॉलिथिलीन विनाइल एसिटेटचे स्पष्ट व लवचिक वलय असते. ज्याची जाडी ४ मिलीमीटर व व्यास ५.५ सेंटीमीटर इतका असतो. इतर संप्रेरक गर्भनिरोधक पद्धतींप्रमाणेच, योनीमार्ग रिंगमध्ये इस्ट्रोजेन आणि प्रोजेस्टोजेन संप्रेरक असतात. हे तेच संप्रेरक असतात जे आपले शरीर तयार करत असते. आपल्या योनीमध्ये एकदा रिंग टाकल्यानंतर ती हळूहळू संप्रेरक सोडते. जे नंतर आपल्या योनिमार्गाच्या अस्तरांद्वारे शोषले जातात. योनिमार्गाच्या रिंगद्वारे सोडलेले संप्रेरक अंडाशयातून स्रीबीजांना बाहेर सोडण्यापासून रोखून गर्भधारणा टाळण्याचे कार्य करतात. अंडाशयातून स्रीबीज बाहेर न पडल्याने शुक्राणू आणि स्रीबीज यांचे मिलन होत नाही. परिणामी स्रीबीज फलित होत नाही व गर्भधारणादेखील होत नाही. हे संप्रेरक गर्भाशयाच्या मुखाजवळ असलेल्या श्लेष्मादेखील दाट करतात. ज्यामुळे शुक्रांणूना स्रीबीजांपर्यंत पोहोचणे शक्य होत नाही. काही शुक्राणू आणि स्रीबीजाचे मिलन झाले तरीही या संप्रेरकांनी गर्भाशयाचे अस्तर पातळ केलेले असते. त्यामुळे फलित अंड्याची वाढ होणे फार कठीण होऊन जाते.

योनीमार्गातील रिंग ही गर्भधारणा टाळण्यासाठी वापरल्या जाणाऱ्या गर्भनिरोधक पद्धतींपैकी एक प्रभावी पद्धत आहे. गर्भधारणा प्रभावीपणे कशी टाळायची हे तुमचे वय किती आहे, तुम्ही किती वेळा लैंगिक संबंध ठेवता, गर्भनिरोधक पद्धतींचे वेळापत्रक योग्य प्रकारे पाळता की नाही यावर अवलंबून असते. गर्भधारणा टाळण्यासाठी योनिमार्ग रिंगचा वापर केल्यास ती ९९ टक्के प्रभावी ठरते. म्हणजेच या रिंगचा वापर करणाऱ्या १०० स्रियांपैकी फक्त १ स्री वर्षभरात गर्भवती होण्याची शक्यता असते. खरंतर, गर्भनिरोधक पद्धतींचे वेळापत्रक पाळणे आणि रिंगचा अचूक वापर करणे हेदेखील आव्हानच आहे. त्यामुळे गर्भधारणा टाळण्यासाठी ही पद्धत ९१ टक्के प्रभावी मानली जाते. अँटीबायोटिक्स रिफाम्पिन, रिफाम्पिसिन आणि रिफामेट, अँटीफंगल ग्रिसिओफुलविन आणि एचआयव्ही औषधे यासारख्या काही विशिष्ट औषधांमुळे गर्भनिरोधक रिंगच्या प्रभावीपणावर परिणाम होऊ शकतो. त्यामुळे गर्भनिरोधक रिंगचा वापर सुरू करण्यापूर्वी तुमच्या डॉक्टरांशी चर्चा करा. तुम्ही घेत असलेल्या सर्व औषधांविषयी त्यांना माहिती द्या. तुमचे डॉक्टर याविषयी मार्गदर्शन करतील तसेच तुमच्यासाठी कोणती गर्भनिरोधक पद्धती योग्य आहे याविषयी मार्गदर्शन करतील.

आपण गर्भवती नसल्यास किंवा गर्भधारणा टाळण्याची इच्छा असल्यास मासिक पाळी दरम्यान कोणत्याही दिवशी योनीमार्गातील रिंगचा वापर सुरू करू शकता. जर तुम्ही मासिक पाळीच्या पहिल्या दिवसापासून ते पाचव्या दिवसापर्यंत रिंग वापरणे सुरू केले तर गर्भधारणा होण्यापासून तुम्हाला त्वरित संरक्षण मिळते. तसेच इतर कोणत्याही दिवशी रिंग वापरण्यास सुरुवात केली तर गर्भधारणा रोखणे प्रभावी होण्यासाठी सात दिवसांचा कालावधी लागतो. या दिवसांमध्ये गर्भधारणेपासून संरक्षण मिळवण्यासाठी इतर गर्भनिरोधक पद्धतींचा वापर करणे आवश्यक आहे. जर तुमच्या मासिक पाळीचा कालावधी २३ किंवा त्यापेक्षा कमी दिवसांचा असेल तर पाचव्या दिवसांपर्यंत रिंग लावण्याची वाट पाहू नका. पाचव्या दिवशी रिंग टाकल्यास गर्भधारणेपासून संरक्षण होण्याची शक्यता कमी होते. रिंग कधीपासून आणि कशी वापरावी याविषयी काही शंका असल्यास आपल्या डॉक्टरांचा सल्ला घ्या. तसेच आपण गर्भधारणेपासून सुरक्षित आहोत की नाही हे जाणून घेण्यासाठी व गर्भधारणा टाळण्यासाठी डॉक्टरांचे मार्गदर्शन मिळवा.

योनीमार्गात एकदा रिंग टाकल्यानंतर, तिचा प्रभाव तीन आठवडे म्हणजेच २१ दिवसांपर्यंत असतो. योनीमार्गात रिंग टाकल्यानंतर त्याला रिंग-इन दिवस म्हणून टिपून ठेवले जाते. त्यानंतर तीन आठवड्यांनी म्हणजेच २१ दिवसांनी रिंग योनीमार्गातून बाहेर काढावी लागते. त्यानंतर पुढील सात दिवस हे रिंग-आऊट दिवस म्हणून टिपून ठेवले जातात. तीन आठवडे पूर्ण झाल्यानंतर पुढील सात दिवस रिंगमुक्त दिवस म्हणून मिळतात. या रिंगमुक्त दिवसांत लैंगिक संबंध ठेवताना तुम्हाला कोणतीही गर्भनिरोधक पद्धत वापरण्याची गरज नसते. ह्या सात दिवसात तुम्ही गर्भधारणेपासून पूर्णपणे सुरक्षित असतात. तसेच या सात दिवसांता तुमची मासिक पाळीदेखील येते. रिंगमुक्त सात दिवस पूर्ण झाल्यानंतर, पुढील २१ दिवसांचे नवीन चक्र सुरू होते. सात दिवस पूर्ण झाल्यानंतर आठव्या दिवशी म्हणजेच नवीन चक्राच्या पहिल्या दिवशी रिंग योनीमार्गात टाकली जाते आणि गर्भधारणा टाळण्यासाठी पुन्हा नवीन चक्राला सुरुवात होते. मासिक पाळी टाळण्याची इच्छा असल्यास तर तुम्ही गर्भनिरोधक पद्धतीचा वापर करू शकता. फक्त ही गर्भनिरोधक रिंग योनीमार्गात महिनाभर राहील याची खात्री करा. गर्भनिरोधक रिंग बदलण्याचे वेळापत्रक पाळण्यासाठी तुम्ही एखादी ठराविक तारिख निश्चित करू शकता. उदाहरणार्थ, महिन्याचे किती दिवस आहेत याचा विचार न करता दर महिन्याच्या १ तारखेला रिंग बदलण्याचा निर्णय तुम्ही घेऊ शकता. तसेच एखाद्या विशिष्ट दिवशी रिंग बदलण्याचे वेळापत्रकदेखील नियोजित करू शकता. उदाहरणार्थ, एखाद्या महिन्याच्या चौथ्या शनिवारी तुम्ही रिंग बदलू शकता. मासिक पाळी टाळण्यासाठी योनीमार्गातील रिंगचा वापर केल्यास, पहिल्या सहा महिन्यांपर्यंत कधीकधी रक्तस्राव किंवा हलका रक्तस्राव होऊ शकतो. ही सामान्य बाब असून जर काही दिवस अथवा महिन्यांपर्यंत हा त्रास कमी होत नसेल तर, आपल्या डॉक्टरांशी चर्चा करा. योनीमार्गातील रिंग पाकीट जेव्हा वापरत नसाल तेव्हा ते सामान्य खोलीच्या तापमानात किंवा थेट सूर्यप्रकाशापासून दूर ठेवा. जर ४ महिन्यांहून अधिक काळ रिंग वापरायची नसेल तर, ते पाकीट रेफ्रिजरेटरमध्ये ठेवा. तसेच पाकिटावरील साठवण करण्याबाबत असलेल्या सूचनादेखील काळजीपूर्वक वाचा.

कधीकधी रिंग-इन, रिंग-आऊट आणि नवीन रिंग बदलण्याचा दिवस यांचे वेळापत्रक पाळणे कठीण होऊन जाते. जर तुम्ही तीन आठवड्यानंतर रिंग बाहेर काढण्यास विसरलात तर, रिंग आऊट झाल्यापासून किती दिवस शिल्लक आहेत यावर गर्भधारणेपासून मिळणारे संरक्षण अवलंबून असते. रिंग आऊट काळ सुरू झाल्यापासून सात दिवसांपेक्षा कमी वेळ रिंग आत असेल तर ते लक्षात येताच रिंग काढून टाका आणि उरलेले रिंगमुक्त दिवस सुरू करा. आठव्या दिवशी नवीन रिंग योनीमार्गात टाका. गर्भधारणा टाळण्यासाठी तुम्हाला इतर कोणत्याही गर्भनिरोधक पद्धतींचा वापर करण्याची आवश्यकता नसते. रिंग आऊट दिवसानंतर सात दिवसांपेक्षाही अधिक काळ रिंग काढण्याचे लक्षात राहिले नसेल तर ते आठवताच रिंग काढून त्वरित रिंग नवीन घालावी. हे नवीन रिंग-इन चक्र म्हणून सुरू करावे. पुढील सात दिवस काळजी म्हणून गर्भधारणा टाळण्यासाठी आणखी एक गर्भनिरोधक पद्धती वापरण्याची आवश्यकता असते. ही गर्भनिरोधक रिंग निघून गेल्यानंतर किंवा काढल्यानंतर तुम्ही लैंगिक संबंध ठेवले असतील आणि गर्भधारणेसंदर्भात मनात काही शंका असतील तर अशावेळी आपल्या डॉक्टरांशी चर्चा करा. गर्भधारणा होण्याच्या शक्यतेबाबत किंवा गर्भधारणा चाचणीबाबत त्यांचे मार्गदर्शन घ्या. योनीमार्गातील रिंग ही बहुतांश स्रियांसाठी सुरक्षित असते. परंतु, काही स्रियांना याचा त्रासदेखील जाणवू शकतो. तुमचे वय ३५ वर्षांपेक्षा अधिक असेल किंवा धूम्रपान करण्याची सवय असेल तर अशावेळी योनीमार्गातील रिंग वापरणे योग्य ठरत नाही. तसेच रक्ताच्या गुठळ्या होण्याचा विकार, स्तनाचा कर्करोग, हृदयविकाराचा झटका, हृदयासंबंधित इतर काही व्याधी, अर्धशिशी, अनियंत्रित उच्च रक्तदाब, मधूमेह किंवा यकृताचे विकार यांसारख्या आरोग्याच्या समस्या असल्यास योनीमार्गातील रिंग वापरणे टाळायला हवे.

गर्भनिरोधक रिंग वापरणे खूप सुरक्षित आहे. परंतु रिंग वापरल्याने तुम्हाला आरोग्याच्या समस्येचा धोका किंचित वाढू शकतो. यामध्ये हृदयविकाराचा झटका, रक्ताच्या गुठळ्या होणे, यकृतात गाठ होणे यांसारख्या आजारांचा धोका असतो. या आरोग्य समस्यांची शक्यता खरोखरच कमी असते. म्हणूनच गर्भधारणा टाळण्यासाठी योनीमार्गाच्या रिंगचा वापर करण्याआधी डॉक्टरांचा सल्ला घ्या. ही गर्भनिरोधक पद्धत वापरावी की नाही तसेच ती वापरताना काय काळजी घ्यावी याविषयी आपल्या डॉक्टरांचे मार्गदर्शन मिळवा. डॉक्टर तुम्हाला इतर गर्भनिरोधक पद्धतीच्या आधारे गर्भधारणा कशी टाळावी याचे योग्य मार्गदर्शन करतील.

ही गर्भनिरोधक पद्धती योग्यरित्या वापरल्या गर्भधारणा टाळण्यासाठी अत्यंत प्रभावी गर्भनिरोधक पद्धतींपैकी एक आहे. गर्भनिरोधक गोळ्यांप्रमाणे रोज ही पद्धत वापरावी लागत नाही. फक्त महिन्यातून एकदा रिंग बदलायची असते. या पद्धतीमध्ये गर्भधारणा होण्यापासून तुम्ही कायम सुरक्षित असतात. तसेच यामुळे लैंगिक संबंधात व्यत्यय येत नाही. या पद्धतीबाबत आपल्या डॉक्टरांकडून पूर्णपणे माहिती घ्या. तसेच आपण एकावेळी एकापेक्षा अधिक रिंगचे पाकीट खरेदी करू शकता. गर्भनिरोधक गोळ्यांसारखे संप्रेरक पोटाद्वारे शोषण्याची आवश्यकता नसते. या पद्धतीमुळे मासिक पाळी नियमित होणे, मासिक पाळीतील वेदना कमी होण्यास मदत होते. तसेच या पद्धतीमुळे मासिक पाळी येण्यापूर्वी होणारा त्रास कमी होतो व मुरूम येण्याचे प्रमाण कमी होऊन त्यांचा त्रासदेखील कमी करते.

प्रभावीपणे गर्भधारणा टाळण्यासाठी योनीमार्ग रिंगचे इन आणि रिंग आऊट वेळापत्रकाचे काटेकोरपणे पालन करणे गरजेचे आहे. हे वेळापत्रक जितके नियमित पाळले जाईल तितकी गर्भधारणेपासून संरक्षण मिळण्याची शक्यता दाट होईल. या वेळापत्रकाचे पालन होण्यासाठी तुम्ही रिमाईंडर म्हणेच स्मरणिकेची मदत घेऊ शकता. काहीवेळा ही रिंग घालणे, काढून टाकणे थोडे त्रासदायक वाटू शकते. तसेच कधीकधी योनीतून स्राव वाढणे, डोकेदुखी, मळमळ, स्तन कोमल होणे, मूड स्विंग्ज होणे यांसारखे दुष्परिणाम जाणवू शकतात. तसेच कधीकधी अति रक्तस्राव किंवा हलका रक्तस्राव होऊ शकतो. या सर्व समस्या काही दिवसांत कमी होणे आवश्यक आहे. जर असे घडले नाही तर आपल्या डॉक्टरांशी संपर्क साधा. गर्भनिरोधक रिंग लैंगिक आजारांपासून संरक्षण करत नाही. त्यामुळे लैंगिक आजापारांपासून संरक्षण मिळवण्यासाठी कंडोमसारख्या गर्भनिरोधक पद्धतींचा वापर करावा. गर्भधारणा टाळण्यासाठी अनेक गर्भनिरोधक पद्धती उपलब्ध आहेत. आपल्यासाठी कोणती गर्भनिरोधक पद्धती योग्य आहे याविषयी जाणून घेण्यासाठी तुम्ही आपल्या डॉक्टरांशी चर्चा करू शकता. तुमच्या शारीरिक व्याधी, परिस्थितीनुसार ते तुम्हाला कोणती गर्भनिरोधक पद्धती वापरावी याविषयी मार्गदर्शन करतील.